اہم خبریں

محکمہ شماریات نے نگران حکومت سے قبل مردم شماری کے حتمی نتائج جاری کرنے کا فیصلہ کرلیا۔

اسلام آباد(مانیٹرنگ ڈیسک) حکومت نے اقتدار نگراں حکومت کے حوالے کرنے سے قبل چھٹی مردم شماری کے نتائج کا باضابطہ اعلان کرنے کا فیصلہ کرلیا۔ حتمی منظوری مشرکہ مفادات کونسل کے اجلاس میں دی جائے گی۔ عبوری نتائج کے مطابق ملک کی کل آبادی 20 کروڑ 7 لاکھ 77 ہزار ہے۔ اضافے کی شرح 2.4 فیصد ریکارڈ کی گئی۔ آبادی کی تعداد کے حوالے سے عبوری اور حتمی نتائج میں زیادہ سے زیادہ 60 ہزار کا فرق ہوسکتا ہے۔البتہ حتمی نتائج کے 2اہم نکات ایسے ہیں جومستقبل کے سیاسی معاملات پر اثر انداز ہوسکتے ہیں۔ مثلاً سندھ کے شہری علاقوںمیں سندھی بولنے والوں کی آبادی میں گزشتہ مردم شماری کے مقابلے میں غیر معمولی اضافہ دیکھنے میں آیا ہے۔ اس میں اضافے کی شرح بھی سندھ میں بسنے والی دیگر قومیتوں کے مقابلے سب سے زیادہ ہے۔اسی طرح بلوچستان میں بھی آبادی میں خاصی تبدیلی دیکھنے میں آئی ہے جس میں بلوچ اور پشتون قوم کی آبادی کا فرق اب ایک فیصد سے بھی کم ہوگیا ۔جوپچھلے 20 برس کے دوران پشتون آبادی میں اضافے کو ظاہر کرتا ہے۔ حتمی نتائج میں زبان مذہب، علاقائی ترقی ، صوبائی، ضلعی اور مقامی کونسل کی بنیاد پرکی گئی۔