زمینی حقائق کو سامنے رکھتے ہوئے متاثرین دیامر بھاشہ ڈیم کی ری سٹیلمنٹ کو یقینی بنائیں گے۔ جی ایم واپڈا

چلاس(بیورورپورٹ)گراونڈ ریلٹیزکو سامنے رکھتے ہوئے متاثرین دیامر بھاشہ ڈیم کی ری سٹیلمنٹ کو یقینی بنائیں گے ۔ڈیم متاثرین کی آباد کاری کیلئے مختلف آپشنز رکھے ہیں ،متاثرین جہاں چاہیں گے وہاں آباد کریں گے ۔ان خیالات کا اظہارجزل منیجر واپڈا لینڈ ایکوزیشن اینڈ ہومین ریسورسس برگیڈئر(ر)شعیب تقی نے چلاس میں صحافیوں سے خصوصی گفتگو کرتے ہوئے کیا۔انہوں نے کہا کہ حقیقی متاثرین دیامر بھاشہ ڈیم کی آباد کاری کیلئے متاثرین کو مختلف آپشن دیں گے اور فردا فردا متاثرین سے رائے لی جائیگی ،آیا متاثرین کہاں بسنا چاہتے ہیں ،انہوں نے کہا کہ حقیقی متاثرین کی اکثریتی رائے کو فوقیت دی جائیگی اور ان کی خواہیش کے مطابق ری سٹلمینٹ کا عمل مکمل کریں گے ۔انہوں نے کہا کہ ڈیم پر اگلے سال کام شروع کریں گے ،ریاستی مفاد کو کوئی بھی چیلنج نہیں کرسکتا ہے ۔انہوں نے کہا کہ چلاس کے مختلف قبائل آپس میں رشتوں کے لڑی میں پروئے ہوئے ہیں ،اپنے اجتماعی مسائل کے حل کیلئے بھی متحد ہوجائیں تاکہ ڈیم متاثرین کی آباد کاری ممکن ہوسکے ،اپنے زاتی مفادات کے کھول سے بھی باہر نہ نکلیں اور آباد کاری کا بھی مطالبہ کریں ،ایسا نہیں ہوسکتا ہے ،تمام قبائل ایک ہوجائیں اور لچک دیکھا کر واپڈا کو متاثرین کی آباد کاری کا موقع فراہم کریں ۔انہوں نے مزید کہا کہ میں حقیقت پسندی پر یقین رکھتا ہوں ظلم اور تشدد کا سخت مخالف ہوں ،انہوں نے کہا کہ متاثرین ڈیم کے مسائل کو ترجیحی بنیادوں پر حل کرنے جارہے ہیں ،ضلعی انتظامیہ کی تعاون سے ڈیم متاثرین سے متعلق تمام مسلے مسائل جلد حل ہونگے ۔انہوں نے کہا کہ دیامر کے نوجوانوں کا مستقبل روشن ہے ،دیامر میں واپڈا کھیلوں کے فروغ کیلئے مزید اقدامات کرے گی اور انٹر ڈسٹرکٹ لیول پر مختلف ایونٹس کا انعقاد کروائیں گے ،جس سے یہاں کے مختلف لوگوں کو ایک دوسرے کو سمجھنے اور آپس میں پیار و محبت کی فضا قائم ہوگی ۔