غیر قانونی ٹیکسز کی خاتمے کے معاملےپر گلگت اور بلتستان کے حکومتی نمائندےتقسیم ہوگئے۔

سکردو(پ ر) سنیئر صوبائی وزیر حاجی محمد اکبر تابان، ممبر گلگت بلتستان کونسل وزیر محمد اخلاق، ممبر صوبائی اسمبلی ایڈووکیٹ غلام حسین ودیگر نے ٹیکس ایشو کے حوالے سے سکردو میں مشترکہ پریس کانفرنس کرتے ہوئے کہا کہ ٹیکس سے متعلق وزیر اعلیٰ گلگت بلتستان حافظ حفیظ الرحمن کی وزیر اعظم شاہد خاقان عباسی سے ملاقات میں اہم پیشرفت ہوئی ہے انشائاللہ بہت جلد عوام کو خوشخبری ملے گی۔صوبائی حکومت ٹیکس ایشو کے حوالے سے ایک پیج پر ہے اور سنجیدگی کے ساتھ ہر عوامی مسائل کے حل کے لئے جدوجہد کررہی ہے اور وزیراعلی کی وزیر اعظم سے ملاقات میں بہت جلد جی بی کونسل کا اجلاس طلب کیا جائے گا اور ٹیکس کا مسئلہ حل ہو جائے گا۔ مشترکہ پریس کانفرنس میں انہوں نے مزید کہا کہ عوام مطئمن رہیں اور کسی بھی سازش کا حصہ نہ بنیں۔ صوبائی وزیر حاجی محمد اکبر تابان کا کہنا تھا کہ صوبائی حکومت جو بھی اعلانات کرتی ہے ان پر من و عن عملدرآمد بھی کراتی ہے۔ جھوٹے وعدوں پر یقین نہیں رکھتے۔پریس کانفرنس میں کمشنر بلتستان حمزہ سالک و دیگر بھی موجود تھے۔
یاد رہے گلگت میں حکومت کی جانب سے مشیر اطلاعات شمس میر اور وزیر قانون اورنگزیب ایڈوکیٹ کا ہنگامی پریس کانفرنس کرتے ہوئے کہا ہے کہ ہماری حکومت کو پیپلزپارٹی کی حکومت مت سمجھیں جو ہڑتال والوں کے مطالبات تسلیم کرے۔ انہوں نے عوام ایکشن کمیٹی پر الزام لگاتے ہوئے کہا کہ عوامی ایکشن کمیٹی اور انجمن تاجران عوام کو گمراہ کررہی ہے انکم ٹیکس ایکٹ 2012 کو کسی بھی صورت ختم نہیں کرسکتے۔