آصف زرداری اور فریال تالپورنے منی لانڈرنگ کیس میں سپریم کورٹ کے فیصلے کو چیلنج کردیا۔

اسلام آباد(ویب ڈیسک /ٹی این این) سابق صدرآصف زرداری اوران کی ہمشیرہ فریال تالپورنے جعلی اکائونٹس کے ذریعے منی لانڈرنگ کیس میںسپریم کورٹ کا فیصلہ چیلنج کردیا،سابق صدرآصف زرداری اوران کی ہمشیرہ فریال تالپورنے ایڈووکیٹ لطیف کھوسہ کے توسط سے عدالت عظمی کے فیصلہ پرنظرثانی کی درخواست دائرکی۔
درخواست میں موقف اختیارکیا گیا ہے کہ ایف آئی اے بینکنگ کورٹ میں فائنل چالان داخل کرنے میں ناکام رہا، عدالت عظمی نے تسلیم کیا کہ جے آئی ٹی قابل قبول شواہد نہیںلاسکی، درخواست گزارچاہتے تھے کہ معاملہ صاف شفاف اندازسے منطقی انجام تک پہنچے، ایف آئی اے تمام اداروں کی مدد کے باوجودقابل جرم شواہد تلاش نہ کرسکا، ایف آئی اے کی استدعا پرسپریم کورٹ نے جے آئی ٹی تشکیل دی، جے آئی ٹی کے سامنے پیش ہوئے،تحریری جواب دیا اور جے آئی ٹی ہمارے خلاف براہ راست شواہد تلاش نہ کرسکی۔
درخواست میں مزید موقف اختیار کیا گیا کہ جے آئی ٹی نے ہمارے موقف کو شامل کئے بغیررپورٹ سپریم کورٹ میں پیش کی وہ مفروضوں اورشکوک وشبہات پرمبنی تھی جب کہ جے آئی ٹی نے بھی معاملے کی مزید انکوائری کی سفارش کی۔
درخواست میں موقف اختیار کیا گیا ہے کہ قانون کی عدم موجودگی میں مختلف اداروں پرمشتمل جے آئی ٹی نہیں بنائی جاسکتی ، سپریم کورٹ 7 جنوری کے فیصلے پرنظر ثانی کرئے، سپریم کورٹ کے حکم سے فیئرٹرائل کا حق متاثر ہوگا جب کہ مقدمہ کراچی سے اسلام آباد منتقل کرنے کا کوئی جواز نہیں تھا، آصف علی زرداری کو ساری زندگی سیاسی انتقام کا نشانہ بنایا گیا جب کہ عدالت نے مراد علی شاہ کا نام جے آئی ٹی رپورٹ سے نکالنے کا حکم فیصلے کا حصہ نہیں بنایا۔
درخواست دائر کرنے کے بعد لطیف کھوسہ نےسپریم کورٹ میں میڈیا سے گفتگوکرتے ہوئےے کہاکہ اس معاملہ میں سپریم کورٹ نے تفتیش سست روی کا شکار ہونے پر ازخودنوٹس لیاملک میں ہزاروں مقدمات سست روی کا شکار ہیںاگر سست روی کا شکار مقدمات کو تیز کرنا مقصود ہے تو سپریم کورٹ دیگر مقدمات کو بھی اٹھا لے