حکومت گلگت بلتستان نے سرکاری ملازمین کو ہارڈ ایریا الائونس کی ادائیگی کے لئے وفا ق سے تین ارب روپے مطالبہ کردیا، رقم حاصل ہونے کی صورت میں پانچ سال کے بقایاجات ادا کریں گے۔

گلگت( نامہ نگار ) حکومت نے سرکاری ملازمین کو الائونس کی ادائیگی کے لئے وفا ق سے تین ارب روپے مطالبہ کردیا۔تفصیلات کے مطابق خطے کے سرکاری ملازمین کو پچاس فیصد ہارڈ ایریا الائونس کے لئےمحکمہ فنانس گلگت بلتستان نے وفاقی فنانس ڈویژن سے تین ارب روپے مانگ لئے ہیں پچاس فیصد الائونس سرکاری ملازمین کو سا ل دو ہزار پانچ سے لیکر دو ہزار نو تک ادا کئے جائیں گے ۔ ذرائع کے مطابق وفاق سے گلگت بلتستان آکر اپنی خدمات سرانجام دینے والے سرکاری ملازمین کو ہارڈ ایر یا کی مد میں پچاس فیصد الائونس ملتا ہے جبکہ گلگت بلتستان کے سرکاری ملازمین کو ہارڈ ایریا الائونس کی مد میں صرف پچیس فیصد الائونس فراہم کیا جاتا ہے ۔اس حوالے سے ملازمین نے سپریم اپیلٹ کورٹ میں اپیل دائر کی تھی کہ ہارڈ ایریا الائونس کی مد میں وفاقی ملازمین کو گلگت بلتستان میں پچاس فیصد الائونس فراہم کیاجاتا ہے جبکہ مقامی ملازمین کے لئے ہارڈ ایریا الائونس کی مد میں صرف پچیس فیصد الائونس ہے۔ لہذا ہارڈ ایریا الائونس تمام ملازمین کو یکساں فراہم کیا جائے ۔ جس پر سپریم اپیلٹ کورٹ کی طرف فیصلہ سناتے ہوئے محکمہ فنانس کو ہدایات جاری کی گئی تھیں کہ گلگت بلتستان کے ملازمین کو بھی ہارڈ ایریا الائونس کی مد میں 50 فیصد الائونس فراہم کیا جائے طویل عرصہ گزرنے کے بائوجود اس فیصلے پر عملدر آمد نہ ہوا تو سرکاری ملازمین یونین نے چیف کورٹ میں اپیل دائر کی تھی جس پر چیف کورٹ نے سپریم اپیلٹ کورٹ کے فیصلے پر فوری عملدر آمد کرنے کی ہدایات جاری کر دی تھی۔ چیف کورٹ کی ہدایات پر عمل کرتے ہوئے محکمہ فنانس نے وفا ق سے بجٹ مانگ لیا ہے۔