وزیراعظم ہاوس کو یونیورسٹی بنانے کا مقصد اپنا قبلہ درست کرنا ہے۔، قوم اور حکومت کی ترجیح تعلیم ہے۔وزیر اعظم

اسلام آباد(مانیٹرینگ ڈیسک/ ٹی این این) وزیراعظم عمران خان نے کہا ہے کہ حکومت کی ترجیح تعلیم ہے۔ وزیراعظم ہاؤس کو یونیورسٹی بنانے کا مقصد اپنا قبلہ درست کرنا ہے، جس ڈاکو سے پیسہ پکڑیں گے اسے تعلیم کے فروغ پر لگائیں گے۔اسلام آباد میں تقریب سے خطاب کے دوران وزیراعظم عمران خان نے کہا کہ چاہتا ہوں کہ نوجوان اپنے ٹیکس کا دفاع کریں اور ٹیکس کے پیسے کےغلط استعمال پر آواز اٹھائے۔ ہم عوام کو باشعور بنا رہے ہیں، وزیراعظم ہاؤس کو یونیورسٹی بنانے کا مقصد اپنا قبلہ درست کرنا ہے، ہم لوگوں کو پیغام دے رہے ہیں کہ اس قوم اور حکومت کی ترجیح تعلیم ہے، جس ڈاکو سے پیسہ پکڑیں گے اسے تعلیم کے فروغ پر لگائیں گے۔
وزیراعظم نے کہا کہ وہی معاشرہ آگے بڑھا جس نے تعلیم اور انسانی ترقی پر زور دیا، وہ ملک ترقی نہیں کرسکتا جہاں چھوٹا سا طبقہ پیسے بنا لے۔ ہمیں انسانوں پر سرمایہ خرچ کرنا چاہیے۔ انہوں نے کہا کہ چین ہمارے لیے زندہ مثال ہے، دنیا میں سب سے زیادہ غریب بھارت میں بستے ہیں۔ ہم بھارت سے بھی پیچھے رہ گئے ہیں۔وزیراعظم عمران خان نے کہا کہ بچپن سے حکمرانوں کے بڑے بڑے گھر دیکھے ہیں، ہمارے حکمران عالیشان محل میں رہتے ہیں۔ برطانیہ کا جی ڈی پی متعدد اسلامی ممالک کا مجموعی جی ڈی پی سے زیادہ ہے۔ سابق برطانوی وزیراعظم ٹونی بلیئر کا گھر لندن کی ٹین ڈاؤننگ اسٹریٹ میں سادہ سی عمارت میں تھا۔ وزیراعظم نے کہا کہ ان میں تبدیلی برطانیہ کے لوگوں کا طرز زندگی دیکھنے کے بعد آئی۔