ایرانی وزیرخارجہ کا آرمی چیف جنرل قمر جاوید باجوہ سے جی ایچ کیو میں ملاقات، اہم امور پر تبادلہ خیال ۔

سلام آباد (مانیٹرنگ ڈیسک)سربراہ پاک فوج جنرل قمر جاوید باجوہ کا کہنا ہے کہ پاکستان خطے کے امن اور استحکام کے لیے مخلص اقدامات کر رہا ہے۔پاک فوج کے شعبہ تعلقات عامہ ( آئی ایس پی آر) کے مطابق آرمی چیف جنرل قمر جاوید باجوہ سے ایرانی وزیر خارجہ جواد ظریف نے جنرل ہیڈ کوارٹر میں ملاقات کی۔آئی ایس پی آر کے مطابق ملاقات میں دو طرفہ تعلقات اور باہمی دلچسپی کے امور پر بات چیت ہوئی جب کہ ایرانی وزیر خارجہ نے خطے میں تنازعات کے حل کے لیے پاکستان کے کردار کی تعریف کی اور اسے تسلیم بھی کیا۔
جواد ظریف کا کہنا تھا کہ پاکستان ہمارا خاص ہمسایہ ملک ہے، پاکستان کے ساتھ بہت اچھے تعلقات ہیں پاکستان کے باہمی اورکثیر القومی تعاون موجود ہے۔ خطے کی سیکیورٹی اور امن کےلئے مل کرکام کریں گے۔وزیر خارجہ شاہ محمود قریشی کا کہنا تھا کہ ایران اورپاکستان ہمسائیہ ملک ہیں۔ ہمارے چیلنجز مشترکہ ہیں آگے بڑھنے کےلئے خیالات کا تبادلہ اہم ہے ملاقات میں مسائل کے حل کے لئے بات چیت ہوئی مقصد صرف امن ،استحکام اور خوشحالی ہے۔
خیال رہے کہ ایران کے وزیر خارجہ محمد جواد ظریف کل پاکستان پہنچے تھے ، پاکستانی دفتر خارجہ کے اعلیٰ حکام کی جانب سے ان کا ایئرپورٹ پر شاندار استقبال کیا گیا تھا۔دفتر خارجہ کے اعلیٰ حکام کے مطابق جواد ظریف دورہ پاکستان کے دوران ملک کے نو منتخب وزیر اعظم عمران خان سے بھی ملاقات کریں گے۔