گلگت بلتستان میں قومی جماعت کی تشکیل کیلئے مقتدر قوتیں سرگرم،وجہ ناقابل یقین۔

گلگت ( نامہ نگار خصوصی) باخبر ذرائع کے مطابق گلگت بلتستان میں قومی حقوق کیلئے بڑھتے ہوئے عوامی شعور اور روایتی صوبے کی مطالبے کو عوام کیطرف سے مسترد کرکے یو۔این۔آو کی قرارداوں کے مطابق داخلی خودمختاری کے مطالبے نے عوام میں خاطر خواہ مقبولیت حاصل کرلی ہے۔ حکومت پاکستان کی جانب سے 71 سالوں سے گلگت بلتستان کے قومی حقوق کو نظر انداز کئے جانے پر صوبے کا مطالبہ کرنے والی جماعتوں کے موقف بھی بدلتے جارہے ہیں۔ گلگت بلتستان میں عرصہ دارز سے عوام میں حکمرانی کرنے والی وفاقی جماعت پاکستان پیپلز پارٹی کے نئے صوبائی صدر نے بھی پرانے مطالبے کو مسترد کرکے متنازعہ حیثیت کی بحالی اور اسکو قانونی تحفظ دینے کا مطالبہ کردیا ہے۔ جبکہ صوبے کا مطالبہ کرنے والی اور سابق حکمران مذہبی کالعدم تحریک جعفریہ اور موجودہ اسلامی تحریک کے اسمبلی میں آپوزیشن لیڈر نے بھی آرڈر 2018کے خلاف ہونے والے عوامی آحتجاجات میں برملا کشمیر طرز کے سیٹ آپ کا مطالبہ کردیا ہے۔ جبکہ دیگر مذہبی جماعتیں جن میں جماعت اسلامی جمعیت علمائے اسلام پہلے سے آزاد کشمیر طرز کے سیٹ آپ کا مطالبہ کرتی آرہی تھی۔ گلگت بلتستان کے عوام کا قومی حقوق کیلئے روایتی مطالبےسے دستبردار ہونے پر مقتدر طاقتیں خائف نظر آرہی ہیں۔ذرائع کا یہ کہنا تھاکہ حقائق پر مبنی عوامی نئے مطالبے کے بعد کالونیل نظام کو ارباب اختیارطبقہ اپنے لئے خطرہ محسوس کررہے ہیں۔ ذرائع کے مطابق کچھ طاقتیں عوام کے اندر قومی حقوق کے لئے یکساں بیداری پیدا ہونے سے سر جوڑ کر بیٹھ گئی ہیں۔ اور وہ طاقتیں بلوچستان طرز کی ایک قومی جماعت بنا کراپنا بنایا گیا منشور دے کر گلگت بلتستان کے عوام کو قومی حقوق کے لئے یکجا موقف ا پنانے کے راستے سے منحرف کرنا چاہتی ہیں۔ ذرائع کے مطابق گلگت بلتستان میں 2020 کو ہونے والے انتخابات سے قبل گلگت بلتستان کی قومی جماعت کا قائم عمل میں لایا جارہا ہے۔