مذہبی جماعتوں کا بڑا اتحاد، مولا نا فضل الرحمن کو اہم ذمہ داریاں سونپ دی گئی۔

کراچی( ویب ڈیسک) مذہبی سیاسی جماعتوں پر مشتمل سیاسی اتحاد متحدہ مجلس عمل کو بحال کردیا گیا جس کا صدر مولانا فضل الرحمان کو منتخب کیا گیا ہے۔ کراچی میں پریس کانفرنس کے دوران جماعت اسلامی کے رہنما لیاقت بلوچ نے متحدہ مجلس عمل (ایم ایم اے) کی بحالی کا اعلان کیا۔ لیاقت بلوچ نے ایم ایم اے کی مرکزی قیادت سے آگاہ کرتے ہوئے بتایا کہ جمعیت علمائے اسلام (ف) کے سربراہ مولانا فضل الرحمان کو ایم ایم اے کا صدر منتخب کیا گیا ہے جب کہ لیاقت بلوچ جنرل سیکریٹری منتخب ہوئے۔ ایم ایم اے کے جنرل سیکریٹری لیاقت بلوچ نے کہا کہ متحدہ مجلس عمل کا مرکزی ورکرز کنونشن اپریل کے پہلے ہفتے میں منعقد کیا جائے گا۔ اس موقع پر پریس کانفرنس میں ایم ایم اے کے نومنتخب صدر مولانا فضل الرحمان نے کہا کہ پوری قوم کو ایم ایم اے کی بحالی کی مبارک باد پیش کرتا ہوں، آج ہم نے نئے سفر کے آغاز کا عہد کردیا ہے، کوشش کریں گے کہ قوم کی امیدوں پرپورا اتریں۔ انہوں نے کہا کہ ہر سطح پر ایم ایم اے میں تنظیم سازی ہوگی، آئندہ انتخاب ایم ایم اے کے پرچم تلے لڑیں گے، ہم ملک میں نئی سیاست کا آغاز کرنے جارہے ہیں، ہمیں امن اور خوشحالی کی ضرورت ہے۔ امیر جماعت اسلامی سراج الحق کا کہنا تھا کہ ایم ایم اے عام شہریوں کی ترجمانی کرےگی، ہم ایک نئے عزم سے سفر کا آغاز کررہے ہیں۔