دہشتگردی کے جھوٹے مقدمات میں گرفتار گلگت بلتستان کے سیاسی قیدیوں کی فوری رہائی کیا جائے۔استور سپریم کونسل کا اعلامیہ

گلگت( پ۔ر) استور سپریم کونسل کے زیر اہتمام گزشتہ روز مقامی ہوٹل میں ستر سالہ آزادی ،استور بشمول گلگت بلتستان کی محرومیاں کے عنوان سے ایک سیمینار منعقد ہوا۔ جس کی صدارت ڈاکٹر غلام عباس نے کی جبکہ سیمینار کی میزبانی استور سپریم کونسل کے جنرل سیکرٹری طاہر ایوب نے کی جس میں گلگت بلتستان کی اہم سیاسی و سماجی شخصیات دانشوروں، صحافیوں اور زندگی کے دیگر طبقاہائے زندگی سے تعلق رکھنے والے شخصیات کی کثیر تعداد نے شرکت کی۔ سیمینار میں موضوع کے اعتبار سے سیر حاصل گفتگو کی گئی اور آخر میں ایک کمیٹی معروف دانشور عنایت اللہ شمالی کی قیادت میں تشکیل دی گئی۔ کمیٹی گلگت بلتستان کی سیاسی و مذہبی جماعتوں کے رہنمائوں سے آئینی حقوق، سی پیک میں گلگت بلتستان کا حصہ دلانے اور ٹیکسوں کے نفاذ کے خلاف مشاورت کرتے گی۔ عوامی ایکشن کمیٹی کی جدو جہد کی حمایت کی گئی۔ کمیٹی گلگت بلتستان کے عوام کو ایک مشترکہ لائحہ عمل پر متفق کرنے کیلئے کام کرے گی۔ اجلاس میں اتفاق سے اس کمیٹی کی منظوری دی گئی۔ کمیٹی کے کنوینئر عنایت اللہ شمالی، دیگر ارکان میں سید جعفر شاہ، ڈاکٹر غلام عباس، طاہر ایوب، حشمت اللہ خان، مولانا سلطان رئیس، سلطان مدد، سید یعسب الدین، ہدایت اللہ، اختر، محمد نصیر خان، شجاعت علی خان، کاشف بونجوی، کیپٹن(ر) شفیع، رضوان علی، انجینئر اسماعیل اور پروفیسر جمشید شامل ہیں۔ اجلاس میں قرارداد کے ذریعے گلگت بلتستان سپریم کونسل باڑی کی تشکیل کیلئے اس کمیٹی کے پلیٹ فارم سے جدو جہد کرنے کا عہد کیا گیا۔ گلگت بلتستان کے سیاسی قیدیوں کی فوری رہائی کا مطالبہ کیا گیا جو دہشتگردی کے جھوٹے مقدمات میں گرفتار ہیں۔