جموں کشمیر کی صورت حال پر مواد کی ا شاعت جرم،ٹیوٹر نے پاکستانیوں کے کاونٹس معطل کرنا شروع کردیا۔

اسلام آباد (مانیٹرنگ ڈیسک/ٹی این این) پاکستان کی حکومت نے کشمیر سے متعلق بیان دینے والے اپنے شہریوں کے سوشل میڈیا اکاؤنٹس کی بندش پر ٹوئٹر کی انتظامیہ سے رابطہ کیا ہے۔وزیرِ اعظم کے ترجمان برائے ڈیجیٹل میڈیا ارسلان خالد نے تصدیق کی ہے کہ پاکستان ٹیلی کمیونیکیشن اتھارٹی (پی ٹی اے) نے ٹوئٹر کے علاقائی دفتر میں سرکاری سطح پر شکایت دائر کرتے ہوئے اکاؤنٹس معطل کرنے کی وضاحت مانگی ہے۔غیر مُلکی میڈیا سے بات کرتے ہوئے انہوں نے کہا کہ حکومت نے ٹوئٹر کو 200 سے زائد اکاؤنٹس کی تفصیلات دی ہیں اور ٹوئٹر سے ان اکاؤنٹس کو فوری بحال کرنے کا مطالبہ کیا ہے۔ اُنکا کہنا تھا کہ ٹوئٹر کو یہ حق حاصل نہیں ہے کہ وہ کسی سیاسی بحث پر قدغنیں لگائیں اگر 23 اگست تک ٹوئٹر کی انتظامیہ جواب نہیں دے گی تو حکومت شواہد کے ساتھ متعلقہ فورم پر بھی جائے گی۔
سوشل میڈیا صارفین کی ایک بڑی تعداد نے شکایت کی ہے کہ کشمیر سے متعلق مواد شائع کرنے پر ان کا اکاؤنٹ معطل کر دیا گیا ہے۔ٹوئٹر کے اس اقدام کے بعد پاکستان میں ’اسٹاپ سسپینڈنگ پاکستانیز‘ (StopSuspendingPakistanis#) کا ہیش ٹیگ بھی ٹرینڈ کرتا رہا۔ جبکہ ٹوئٹر کی جانب سے کشمیر سے متعلق مواد شائع کرنے والے اکاؤنٹس کی بندش پر کوئی ردّ عمل سامنے نہیں آیا ہے۔
ٹوئٹر نے جولائی سے دسمبر 2018 کے درمیان بھارت کی جانب سے موصول ہونے والی 422 درخواستوں میں 18 فی صد پر عمل کرتے ہوئے متعدد اکاؤنٹس بلاک کیے جب کہ دوسری جانب اس عرصے میں پاکستان کی جانب سے کی گئی تمام درخواستوں کو مسترد کیا تھا۔