اہم خبریں

پنجاب ہاوس مری کو یونیورسٹی بنانے کا فیصلہ، نئی درسگاہ کا نام بھی سامنے آگیا۔

مری(ویب ڈیسک /ٹی این این)ملکہ کوہسار کے مکینوں کے لیے بڑی خوشخبری ہے کہ مری کے پنجاب ہاؤس کو یونیورسٹی میں تبدیل کرنے کا فیصلہ کیا گیا ہے۔نجی ٹی وی کے مطابق ڈپٹی کمشنر راولپنڈی علی رندھاوا کی سربراہی میں پنجاب ہاؤس کو یونیورسٹی میں تبدیل کرنے کے حوالے سے اہم اجلاس ہوا جس میں انتظامیہ اور سیاسی شخصیات نے شرکت کی۔
اجلاس میں طویل غورو خوض اور تمام پہلوؤں کا جائزہ لینے کے بعد مری کے پنجاب ہاؤس کو یونیورسٹی میں تبدیل کرنے کا فیصلہ کیا گیا۔ ڈپٹی کمشنر کا کہنا ہے کہ پنجاب ہاؤس 86 کنال پر محیط ہے اور اب مری کے رہائشیوں کے لیے یہاں یونیورسٹی بنائی جائے گی جب کہ ضرورت پڑنے پر مری بروری کی اراضی کو بھی یونیورسٹی کا حصہ بنایا جائے گا۔علی رندھاوا نے بتایا کہ پنجاب حکومت کی ہدایت پر پنجاب ہاؤس کو یونیورسٹی میں تبدیل کیا جا رہا ہےاور اس نئی درس گاہ کا نام کوہسار یونیورسٹی مری تجویز کیا گیا ہے۔