ز یر التواءمقدمات کی قصوروار عدالتیں نہیں کوئی اور ہے۔چیف جسٹس آصف سعید کھوسہ

اسلام آباد(ویب ڈیسک/ٹی این این) چیف جسٹس آصف سعید کھوسہ نے کہا ہے کہ ز یر التواءمقدمات کی قصوروار عدالتیں نہیں کوئی اور ہے‘عدالتوں میں زیر التواءمقدمات کی تعداد 19لاکھ ہوگئی ہے‘ گزشتہ ایک سال میں عدالتوں نے 31لاکھ مقدمات نمٹائے جن میں سے 26ہزار مقدمات صرف سپریم کورٹ نے نمٹائے‘ عدلیہ جتنی محنت کررہی ہے حالات جلد بہتر ہونگے۔جمعہ کو سپریم کورٹ میں ضمانت منسوخی کی درخواست کی سماعت کے دوران چیف جسٹس آصف سعید کھوسہ نے زیر التواءمقدمات سے متعلق ریمارکس میں کہا کہ عدالتوں میں ججز کی پچیس فیصد آسامیاں خالی ہیں۔ اگر یہ آسامیاں پر کرلی جائیں تو تمام زیر التواءمقدمات ایک دو سال میں ختم ہوجائیں گے۔ پاکستان میں بائیس کروڑ آبادی کے لئے صرف تین ہزار ججز ہیں۔ عدالتوں میں زیر التواءمقدمات کی تعداد 19لاکھ ہوگئی ہے۔ گزشتہ ایک سال میں عدالتوں نے 31لاکھ مقدمات نمٹائے جن میں سے 26ہزار مقدمات صرف سپریم کورٹ نے نمٹائے۔ امریکہ کی سپریم کورٹ نے گزشتہ ایک سال میں صرف 80سے 90مقدمات نمٹائے۔ ججز کی کمی کے باوجود ہمارے ججز زیر التواءمقدمات نمٹانے کی بھرپور کوشش کررہے ہیں۔ چیف جسٹس نے کہا کہ ہماری کوششوں کے باوجود بھی لوگ عدلیہ کو تنقید کا نشانہ بناتے ہیں۔ عدلیہ جتنی محنت کررہی ہے حالات جلد بہتر ہونگے۔ ہم دن رات کام کررہے ہیں پھر بھی عدالتوں کو زیر التواءمقدمات کا طعنہ دیا جاتا ہے۔ زیر التواءمقدمات کی قصوروار عدالتیں نہیں کوئی اور ہے۔