اہم خبریں

چلاس پولیس کی کامیاب کاروائی،چرس کے کاروبار میں ملوث شخص گرفتار۔

چلاس (قادر حسین)جی بی سپیشل برانچ کی نشاندہی پر پولیس نے چرس کے کاروبار میں ملوث شخص کو شاہین کوٹ میں چھاپا مار کر گرفتار کر لیا اور ملزم سے ایک کلو چرس بھی برآمد کیا گیا۔ملزم زیب عالم کو ہفتے کے روز جی بی سپیشل برانچ دیامر کے انچارج انسپکٹر شاہ خالد اور اس کے ٹیم کی نشاندہی پر ایس ایچ او سٹی تھانہ چلاس شاہ سرورکی قیادت میں پولیس ٹیم نے چھاپا مار کر رنگے ہاتھوں گرفتار کرلیا،اور چرس بھی برآمد کیا گیا۔پولیس نے ملزم کے خلاف مقدمہ درج کرکے مزید تفتیش شروع کردی ہے۔چلاس سٹی تھانہ میں قائم مقام ایس پی امیر اللہ نے پریس کانفرنس کرتے ہوئے کہا کہ چلاس میں چرس کے گھناونے دھندے میں ملوث عناصر کے خلاف کارروائی جاری ہے ،اس گھناونے جرم میں ملوث کسی بھی شخص کو نہیں بخشا جائیگا،دیامر پولیس منشیات کے خلاف کارروائیوں میں مصروف ہے انشاء اللہ بہت جلد دیامر کو منشیات کی لعنت سے پاک کردیں گے۔انہوں نے کہا کہ دیامر پولیس گزشتہ دو سالوں سے منشیات کے خلاف برسر پیکار ہے اور اس جرم میں درجنوں منشیات فروشوں کو جیل کے سلاخوں کے پیچھے دھکیل دیاگیا ہے اور مزید بھی کارروائیاں جاری ہیں ۔