اہم خبریں

آغا سراج درانی کی بیٹی کے اکاؤنٹ سے کروڑوں کی ٹرانزکشن،اہم شخصیت کو گرفتار کرنے کا فیصلہ۔

کراچی(ویب ڈیسک/ٹی این این) سپیکر سندھ اسمبلی آغا سراج درانی کی بیٹی کے اکاؤنٹ سے بزنس مین گلزار احمد کے اکاؤنٹ میں کروڑوں روپے کی ٹرانزکشن کا انکشاف ہوا ہے۔نجی ٹی وی کے مطابق آغا سراج درانی کیس میں نیب نے بزنس مین گلزار احمد کے وارنٹ گرفتاری جاری کر دیئے ہیں۔ ذرائع کا کہنا ہے کہ نیب نے گلزار احمد کا نام ای سی ایل میں ڈالنے کی سفارش بھی کر دی ہے اور نیب کی سفارش پر گلزار احمد کا نام ایف آئی اے واچ لسٹ میں بھی شامل کر دیا گیا ہے۔
ذرائع کا بتانا ہے کہ گلزار احمد کی دبئی سے واپسی پر انہیں گرفتار کر لیا جائے گا۔ ذرائع کے مطابق گلزار احمد کے اکاؤنٹ میں آغا سراج درانی کی بیٹی کے اکاؤنٹ سےکروڑوں روپے منتقل ہوئے۔خیال رہے کہ نیب نے دو روز قبل آغا سراج درانی کو آمدن سے زائد اثاثوں کے کیس میں اسلام آباد سے گرفتار کیا تھا جہاں سے انہیں کراچی منتقل کیا گیا۔