ہنزہ شسپر گلیشیئر سرکنے کے عمل میں تیزی آگئی،نقل مکانی شروع۔

ہنزہ(ٹی این این)گلگت بلتستان کے ضلع ہنزہ میں 3 ماہ کے دوران شسپر گلیشیئر 1 ہزار 750میٹر تک سرک گیا۔ ڈیزاسٹر مینجمنٹ اتھارٹی کے مطابق اب بھی یہ گلیشیئر روزانہ 7 میٹر سرک رہاہے اور تین ماہ میں یہ اپنے مقام سے 1750میٹر آگے آچکا ہے۔ڈیزاسٹر مینجمنٹ اتھارٹی نے بتایا کہ 1300 میٹر چوڑا اور 600 فٹ لمبا برف کا یہ پہاڑ مسلسل آبادی کی جانب بڑھ رہا ہے۔ڈسٹرکٹ ڈیزاسٹر مینجمنٹ اتھارٹی سیٹلائٹ کے ذریعے مسلسل اس گلیشیئرکی نگرانی کر رہی ہے۔شسپر گلیشیئر کے سرکنے سے پانی کا بہائو بھی رک گیا جس کے باعث حسن آباد کے 2 بجلی گھروں سے بجلی کی ترسیل مکمل بند ہے اور ہنزہ کی 70فیصد آباد بجلی سے محروم ہو چکی ہے، متبادل کے طور پر علاقے میں جنریٹر سے 2 گھنٹے کے لیے بجلی دی جاتی ہے۔سرکنے کے عمل سے قریبی آبادی کو خطرہ ہے، جبکہ گرمیوں میں جھیل سے پانی کے اخراج کے باعث سیلاب آنے کا بھی امکان ہے۔ڈائریکٹر ڈی ایم اے کے مطابق انتہائی خطرے کے لیے تیاری مکمل کرلی گئی ، ممکنہ خطرے کے پیش نظر 72 گھرانوں کو محفوظ مقام پر منتقل کیا گیا جبکہ آبادی کو گلیشئر اور سیلاب سے بچانے کے لیے حفاظتی بند بنانے کا کام بھی شروع کر دیا گیا ۔ڈائریکٹر جی بی ڈی ایم اے کے مطابق متبادل سڑک کی مرمت اور پل بنانے کا انتظام بھی کرلیا گیا جبکہ کسی بھی خطرے کے پیش نظر ہنزہ میں خوراک کا بھی ذخیرہ کیا گیا ۔