پاکستان میں غذائی قلت ،جاپان نے دو ارب بائیس کروڑ روپے کی امداد کا اعلان کردیا۔

اسلام آباد(مانیٹرنگ ڈیسک/ٹی این این) جاپان کی حکومت نے اعلان کیا ہے کہ وہ غذائی قلت کے خاتمے ، معاشی بہتری اور قدرتی آفات سے نمٹنے کے لیے پاکستان کو ایک کروڑ 60 لاکھ ڈالر (2 ارب 22 کروڑ روپے سے زائد) کی امداد دے گی۔یہ امداد خیبرپختونخوا، سندھ اور بلوچستان میں غذائی قلت کے خاتمے سے متعلق اقدامات کے لیے فراہم کی جائے گی۔
حالیہ امداد جاپانی حکومت کے اقوام متحدہ کے ترقیاتی پروگرام (یو این ڈی پی) اور ورلڈ فوڈ پروگرام (ڈبلیو ایف پی) کے ساتھ شراکت داری کا حصہ ہے۔امداد سے 35 لاکھ ڈالر خیبرپختونخوا میں تیزی سے غذائی قلت کا شکار ہونے والی ایک لاکھ 55 ہزار ماؤں اور بچوں سمیت افغان مہاجر خاندانوں کے فوری علاج کے لیے استعمال کیے جائیں گےجو یہاں آباد ہیں۔اس متعلق ڈبلیو ایف پی کے نمائندے فن بار کیورن کا کہنا تھا کہ ’ڈبلیو ایف پی غذائی قلت کا شکار ماؤں اور بچوں کے لیے امداد میں تعاون پر جاپانی حکومت کے شکر گزار ہے۔
انہوں نے کہا کہ ہمیں پاکستان کے غریب خاندانوں میں سے کچھ کی مدد کے لیے ساتھ دینے پر فخر ہے ۔خیال رہے کہ خیبرپختونخوا کے قبائلی علاقوں میں یو این ڈی پی کے استحکام کے ذریعے بہتر ذریعہ معاش کے اقدام کے لیے بھی جاپانی معاونت میں 35 لاکھ 50 ہزار ڈالرشامل ہیں۔علاوہ ازیں جاپانی حکومت قدرتی آفات، پائلٹ سونامی ابتدائی انتباہی نظام اور سمندری آفات سے ساحلی آبادیوں، خاص طور پر خواتین اور بچوں کی حفاظت کے لیے قومی اور مقامی سطح پر بھی اقدامات میں تعاون کرے گی جس کا اطلاق کراچی کے ضلع ملیر ، غربی اور گوادر کے اضلاع میں ہوگا جس سے 15 ہزار لوگوں کو فائدہ ہوگا۔