اہم خبریں

نیب کا میگا منی لانڈرنگ کیس کراچی سے راولپنڈی منتقل کرنے کی درخواست۔

کراچی(ویب ڈیسک /ٹی این این) چیئرمین نیب نے میگا منی لانڈرنگ کیس راولپنڈی منتقل کرنے کی درخواست کردی۔نیب حکام نے کراچی کی بینکنگ کورٹ میں چیئرمین نیب جسٹس (ر) جاوید اقبال کی دستخط شدہ دستاویزات پیش کی ہیں جس میں میگا منی لانڈرنگ کیس کو راولپنڈی منتقل کرنے کا کہا گیا ہے۔
چیئرمین نیب کی جانب سے کہا گیا ہےکہ سپریم کورٹ نےنیب منی لانڈرنگ کیس کی تفتیش کا حکم دیا ہے لہٰذا کیس کو نیب کورٹ راولپنڈی منتقل کرنے کے احکامات دیے جائیں۔قومی احتساب بیورو کے چیئرمین نے نیب آرڈیننس کی شق 16 اے کے تحت احکامات دیے ہیں۔کراچی کی بینکنگ کورٹ نے چیئرمین نیب کی درخواست پر کیس میں نامزد آصف زرداری اور فریال تالپور سمیت دیگر کو 20 فروری کے نوٹس جاری کردیے ہیں۔
یاد رہے کہ ایف آئی اے جعلی بینک اکاؤنٹس کے ذریعے منی لانڈرنگ کی تحقیقات کررہی ہے اور اس سلسلے میں اومنی گروپ کے سربراہ انور مجید اور نجی بینک کے سربراہ حسین لوائی بھی ایف آئی اے کی حراست میں ہیں جب کہ تحقیقات میں تیزی کے بعد سے اب تک کئی جعلی اکاؤنٹس سامنے آچکے ہیں جن میں فالودے والے اور رکشے والے کے اکاؤنٹس سے بھی کروڑوں روپے نکلے ہیں۔