کوکین اسمگلر کا وزیر مملکت شہریار آفریدی سے دوستی کے دعوے نے تہلکہ مچا دیا۔

اسلام آباد(مانیٹرنگ ڈیسک/ٹی این این)وزیر مملکت برائے امور داخلہ شہریار آفریدی نے کہا ہے کہ منشیات کے خلاف ان کی جانب سے مہم چلائے جانے کے بعد مجرمانہ ذہینیت کے لوگ ان کے ساتھ تصاویر بنا کر سوشل میڈیا پر ڈال رہے ہیں اور ان کی ساکھ کو نقصان پہنچا رہے ہیں۔
انہوں نے یہ بات اتوار کو سامنے آنے والی ان اخباری رپورٹوں کے جواب میں کہی جن میں انکشاف ہوا ہے کہ اینٹی نارکوٹکس فورس(اے این ایف) نے اسلام آباد سے کوکین کے ایک بڑے اسمگلر قاسم کو گرفتار کیا ہے جس نے شہریار آفریدی کا ’’بیسٹ فرینڈ‘‘ ہونے کا دعویٰ کیا ہے۔
شہریار آفریدی کے ساتھ قاسم کی ایک تصویر بھی سامنے آئی ہے جس میں یہ دونوں اور چند دیگر افراد ایک سڑک کے کنارے کھڑے کیمرے کی طرف دیکھ رہے ہیں۔ذرائع کے مطابق قاسم کو اسلام آباد کے سیکٹر ایف 8 سے گرفتار کیا گیا اور اس کے قبضے سے جو منشیات برآمد ہوئی اس کی مالیت ایک ارب روپے بتائی جاتی ہے۔ اسے اے این ایف پولیس اسٹیشن منتقل کرکے تفتیش کی گئی۔قاسم کے بارے میں بتایا گیا ہے کہ وہ راولپنڈی اور اسلام آباد میں نہ صرف انفرادی گاہکوں کو منشیات فراہم کرتا تھا بلکہ مختلف پارٹیوں میں کوکین بھی پہنچتا تھا۔
ذرائع کے مطابق قاسم کے فون سے مختلف پیغامات برآمد ہوئے۔ ایک میں اس نے کسی کو دھمکی دیتے ہوئے کہا کہ اس کا کوئی کچھ نہیں بگاڑ سکتا کیونکہ وہ شہریار آفریدی کا بیسٹ فرینڈ ہے۔انگریزی اخبار دی نیشن نے اپنی رپورٹ میں لکھا کہ اس حوالے سے وزیرمملکت کا مؤقف لینے کی کوشش کی گئی لیکن انہوں نے جواب نہیں دیا۔ اخبار نے اے این ایف حکام کے حوالے سے لکھا کہ قاسم کو ریمانڈ کے لیے عدالت کے سامنے پیش کیا جائے گا۔
صحافیوں نے اتوار کے روز وزیر مملکت داخلہ سے اس حوالے سے سوالات کیے جس پر شہریار آفریدی کا کہنا تھا کہ منشیات کے خلاف مہم چلانے پر چند مجرمانہ ذہنیت کے لوگ ان کے ساتھ تصاویر بناکر سوشل میڈیا پر ڈال رہے ہیں ، ان کی شہرت کو نقصان پہنچارہے ہیں۔
انہوں نے کہا کہ عام سیاسی ورکرہوں، کسی کو اپنے ساتھ تصاویر بنانے سے نہیں روک سکتا، منشیات کی روک تھام کے لیے سڑکوں ، بسوں ، مساجد میں جاکر آگاہی مہم چلارہاہوں، اس مہم کے دوران کوئی میرے ساتھ تصویر بناکر استعمال کررہاہے تواس سے میرا تعلق نہیں۔ مہم کے دوران کئی لوگوں نے میرے ساتھ تصاویر بنائی ہونگی، میں نے ان لوگوں پر ہاتھ ڈالا ہے اس لیے یہ لوگ میری شہرت کو نقصان پہنچارہے ہیں ، میرا اور عمران خان کا وژن ہے کہ ملک کو ڈرگ فری بناناہے۔شہریارآفریدی نے کہا کہ وفاقی دارالحکومت اسلام آبادسمیت ملک بھر میں منشیات کے خلاف مہم میں نے خود لانچ کی، منشیات کے خلاف مہم میں وزیراعظم عمران خان کی حمایت حاصل ہے۔