جعلی ڈگریوں کے حامل پی آئی اے کے تین پائلٹوں سمیت مرد ، خواتین پر مشتمل پچاس کیبن عملہ برطرف ۔

اسلام آباد(ویب ڈیسک/ٹی این این)جعلی ڈگریوں کے حامل پی آئی اے ملازمین پر بجلی گر گئی، ترجمان پی آئی اسے کے مطابق 3 پائلٹوں کو جعلی ڈگری پر ملازمت سے فارغ کر دیا گیا، جبکہ مرد و خواتین پر مشتمل 50 کیبن عملے کو بھی نوکریوں سےبرطرف کر دیا گیا۔ترجمان کا کہنا تھا کہ ملازمین کے خلاف کارروائی سپریم کورٹ کی ہدایت پرکی گئی۔ترجمان سول ایوی ایشن کے مطابق ڈائریکٹر جنرل سول ایوی ایشن نے جعلی ڈگری رکھنے والے تمام پائلٹس کے لائسنس معطل کرنے کا حکم دے دیا۔ترجمان کے مطابق جعلی ڈگری اورجعلی سرٹیفکیٹس رکھنے والے کیبن کریو کے بھی لائسنس فوری معطل کرنےکاحکم دیا گیا ہے۔ترجمان کے مطابق اس کے ساتھ ہی اپنی ڈگریاں جمع نہ کرانے والوں کے لائسنس بھی اس وقت تک کےلئے معطل کردیے گئے جب تک ڈگریاں جمع نہیں کرائی جاتیں۔ترجمان پی آئی اے کے مطابق انتظامیہ نے جعلی ڈگری والے پائلٹس اور کیبن کریو کے خلاف کارروائی کی اور مجموعی طور پر 53 ارکان کو ملازمت سے فارغ کردیا۔
یاد رہے کہ اس سے قبل سپریم کورٹ آف پاکستان نے دسمبر 2018 کے پہلے ہفتے میں پی آئی اے پائلٹس اور عملے کی جعلی ڈگری کیس میں پی آئی اے ،سول ایوی ایشن اور متعلقہ اداروں کے سربراہان کو ذاتی حیثیت میں طلب کیا تھا۔ سپریم کورٹ میں دوران سماعت اسٹنٹ اٹارنی جنرل نے عدالت عظمیٰ کو بتایا تھا کہ پی آئی اے پائلٹس اور عملے کی 73 ڈگریاں جعلی ہیں۔