میگا منی لانڈرنگ کیس، عدالت نے اومنی گروپ کی جائیدادیں منجمد کرنے کا حکم دے دیا۔

لاہور (ویب ڈیسک/ٹی این این) جعلی بینک اکاؤنٹس کے ذریعے منی لانڈرنگ کیس میں سپریم کورٹ نے سابق صدر آصف زرداری کو نوٹس جاری کرتے ہوئے 31 دسمبر کو جواب طلب کر لیا۔ عدالت نے اومنی گروپ کی جائیدادیں تاحکم ثانی منجمد کرنے کا حکم دے دیا۔ جعلی بینک اکاؤنٹس سے متعلق از خود نوٹس کیس کی سپریم کورٹ لاہور رجسڑی میں سماعت ہوئی۔ عدالتی حکم پر جے آئی ٹی رپورٹ پروجیکٹر پر چلائی گئی۔ جے آئی ٹی رپورٹ میں کہا گیا کراچی اور لاہور میں بلاول ہاؤس کے پیسے جعلی اکاؤنٹس سے ادا کئے گئے، بلاول ہاؤس لاہور کی اراضی زرداری گروپ کی ملکیت ہے۔
جسٹس اعجاز الاحسن نے کہا اگر اراضی گفٹ کی گئی تو پیسوں کیوں ادا کئے گئے ؟ کیا گفٹ قبول نہیں کیا گیا تھا ؟ سربراہ جے آئی ٹی نے کہا زرداری گروپ نے 53 ارب کے قرضے حاصل کئے، 24 ارب قرضہ سندھ بینک سے لیا گیا، اومنی گروپ نے گروپ کو 5 حصوں میں تقسیم کر کے قرضے لئے،اومنی سے زرداری گروپ کے ذاتی اخراجات بھی ادا کئے جاتے رہے۔چیف جسٹس ثاقب نثار نے کہا ایان علی کہاں ہیں ؟ کیا ایان علی بیمار ہو کر پاکستان سے باہر گئیں ؟ کوئی بیمار ہو کر باہر چلا گیا تو واپس لانے کا طریقہ کیا ہے ؟
اومنی گروپ اور آصف زرداری کے وکیل عدالت میں پیش ہوئے، جے آئی ٹی نے سربمہر رپورٹ سپریم کورٹ میں پیش کی، جے آئی ٹی نے عدالت کو بتایا کہ اومنی گروپ کے صدر انور مجید جے آئی ٹی سے کوئی تعاون نہیں کر رہے بلکہ بدمعاشی کر رہے ہیں۔
چیف جسٹس نے اومنی گروپ کے وکلا سے مکالمہ کرتے ہوئے کہا کہ لگتا ہے اومنی گروپ مالکان کا غرور ختم نہیں ہوا، قوم کے اربوں روپے کھا گئے، پھر بھی بدمعاشی کر رہے ہیں، لگتا ہے انہیں اڈیالہ سے کہیں اور شفٹ کرنا پڑے گا، انور مجید کےساتھ اب کوئی رحم نہیں، آپ وکیل ہیں، آپ کو سنیں گے لیکن فیصلہ ہم نے ہی کرنا ہے۔ چیف جسٹس نے آصف زرداری کے وکیل فاروق نائیک سے مکالمہ کرتے ہوئے کہا کہ اربوں کے کھانچے ہیں، معاف نہیں کریں گے۔