اہم خبریں

قومی اسمبلی میں قائد حزب اختلاف شہباز شریف بلا مقابلہ چیئرمین پبلک اکاؤنٹس کمیٹی منتخب۔

اسلام آباد(ویب ڈیسک/ٹی این این)سابق وزیراعلیٰ پنجاب اور قومی اسمبلی میں قائد حزب اختلاف شہباز شریف بلا مقابلہ چیئرمین پبلک اکاؤنٹس کمیٹی منتخب ہوگئے، شیخ روحیل اصغر نے شہباز شریف کا نام تجویز کیا اور کسی نے بھی شہباز شریف کے نام کی مخالفت نہیں کی۔
پبلک اکاؤنٹس کمیٹی کا بلا مقابلہ چیئرمین منتخب ہونے پر اراکین پی اے سی مشاہد حسین، پرویز اشرف اور شیری رحمان سمیت دیگر نے شہبازشریف کو مبارک باد دی، اس موقع پر شہباز شریف کا کہنا تھا کہ تمام اراکین کے اعتماد کا شکر گذارہوں، پی اے سی ایک موثر فورم ہے، سب کو ساتھ لیکر چلوں گا، احتساب کا عمل شفاف ہوگا اور احتسابی عمل کو بہتر بنانا ضروری ہے۔
واضح رہے کہ گزشتہ روز حکومت اور اپوزیشن کے درمیان قائمہ کمیٹیوں کے فارمولے پراتفاق ہوگیا تھا، ذرائع کے مطابق حکومت اوراتحادیوں کو 20 کمیٹیوں کی چیئرمین شپ ملے گی جب کہ اپوزیشن جماعتوں کو 18 کمیٹیوں کی سربراہی دی جائے گی۔