انسداد دہشت گردی کی عدالت کا ایم کیوایم کے تین اہم رہنماوں کومنی لانڈرنگ کیس میں گرفتار کرنےکا حکم۔

کراچی(مانیٹرنگ ڈیسک) انسداد دہشت گردی کی عدالت نے ایف آئی اے کو منی لانڈرنگ کیس میں بابر غوری، احمد علی، سہیل منصور اور ارشد وہرا کو گرفتار کر کے یکم دسمبر کو پیش کرنے کا حکم دیا ہے۔کراچی کی انسداد دہشت گردی کی عدالت میں بانی ایم کیو ایم کے خلاف منی لانڈرنگ کیس کی سماعت ہوئی جس میں ایف آئی اے کے تفتیشی افسر غلام مرتضیٰ راہو عدالت میں پیش ہوئے۔
عدالت نے تفتیشی افسر نے استفسار کیا کہ بابرغوری کی گرفتاری کے لیے آپ نے کیا کوشش کی؟۔ اس پر تفتیشی افسر نے بتایا کہ بابر غوری پہلے دبئی اور اب امریکا چلے گئے ہیں انہیں انٹرپول کی مدد سے گرفتار کریں گے۔عدالت نے سہیل منصور، ارشد وہرا کی گرفتاری کے بارے میں بھی پوچھا جس پر تفتیشی افسر نے بتایا کہ ملزمان کی گرفتاری کے لیے چھاپے مارے جارہے ہیں۔ ملزمان گرفتاری کے ڈر سے روپوش ہو گئے ہیں۔
تفتیشی افسر نے ملزمان کی گرفتاری کے لیے عدالت سے آئندہ سماعت تک مہلت طلب کی جس پر عدالت نے چاروں مفرور ملزمان بابر غوری، خواجہ سہیل منصور، احمد علی اور ارشد ہ وہرا کے ایک بار پھر ناقابل ضمانت وارنٹ گرفتاری جاری کیے۔ عدالت نے ملزمان کو گرفتار کر کے یکم دسمبر کو پیش کرنے کا حکم دیا ہے۔واضح رہے کہ ایم کیو ایم کے سربراہ اور خدمت خلق فاؤنڈیشن کے خلاف منی لانڈرنگ کا مقدمہ 2017 میں کراچی میں درج کیا گیا تھا مگر بعد میں اسے ایف آئی اے انسداد دہشت گردی ونگ اسلام آباد میں منتقل کردیا گیا تھا۔