تھلچی ٹول پلازہ غیر قانونی ہے،گلگت بلتستان کے عوام پرکسی بھی طرح کے ٹیکس قبول نہیں۔ ٹرانسپورٹ ایسو سی ایشن

چلاس(عمر فاروق فاروقی) گلگت بلتستان و کوہستان ٹرانسپورٹ ایسوسی ایشن کا مشترکہ اجلاس چلاس کے مقامی ہوٹل میں منعقد ہوا ۔اجلاس میں ٹرانسپورٹ ایسو سی ایشن کے تمام عہدیداروں نے شرکت کی۔اجلاس میں کہا گیاکہ تھلچی کے مقام پر ٹول پلازہ غیر قانونی طور پر لگا دیا گیا ہے، گلگت بلتستان کے عوام پر اس طرح کے ٹیکس ناقابل برداشت ہے، لہذا فوری طور پر تھلچی سے ٹول پلازہ ختم کر دیا جائے۔اجلاس میں کہا گیا کہ گلگت بلتستان اور راولپنڈی کے درمیان چلنے والی ٹرانسپورٹ گاڑیوں میں سیکورٹی گارڈ کی اب ضرورت نہیں رہی ہے شاہراہ قراقرم پر جگہ جگہ سیکورٹی کا مربوط اور موثر نظام ہے، لہذا بسوں اور کوسٹرز کے اندرتعینات سیکورٹی گارڈز کوختم کیا جائے، کیونکہ سیکورٹی گارڈ کی تعیناتی سے ٹرانسپورٹ مالکان کو معاشی نقصان کا بھی سامنا ہے۔اجلاس میں کہا گیا کہ شاہراہ قراقرم پر 24گھنٹے ٹرانسپورٹ کی روانی کو یقینی بنایا جائے، شام 5بجے بشام اور تھلچی کے مقام پر ٹرانسپورٹ گاڑیوں کو نہ روکا جائے، اس سے مسافروں کو مشکلات سے دوچار ہونا پڑتا ہے۔اجلاس میں کہا گیا کہ گلگت بلتستان اور کوہستان کے تمام ٹرانسپورٹ مسافر وں سے سرکار کی طرف سے جاری کردہ کرایہ وصول کرے گی، خلاف ورزی کرنے والوں کے خلاف کارروائی کی جائےگی۔