متاثرین دیامر بھاشا ڈیم ایک بار پھر سڑکوں پر،معاہدہ 2010 پر عمل درآمد کا مطالبہ۔

گلگت (تحریر نیوز نیٹ ورک) متاثرین دیامر بھاشا ڈیم کمیٹی کے ممبران نے گلگت پریس کانفرنس کرتے ہوئے ایک بار پھر مطالبات کی منظوری اور ماضی میں کئے ہوئے وعدوں پر عمل درآمد رکرنے کا مطالبہ کردیا۔ متاثرین کا کہنا تھا کہ حکومت معاہدہ 2010 کے مطابق طے شدہ ماڈل ویلیجز میں متاثرین کی فوری آبادکاری کا بندوبست کیا جائے اور ان تمام کاموں کی تکمیل کیلئے چلاس ڈویلپمنٹ اتھارٹی کا قیام جلد از جلد عمل میں لایا جائے۔ اُنہوں نے مطالبہ کیا ہے کہ پاکستان کے تمام کالجز میں متاثرین دیامر بھاشا ڈیم کو خصوصی کوٹہ مختصکریں اورمعاہدے کے مطابق متاثرین کو ملازمتیں دی جائیں ۔
متاثرین کا یہ بھی مطالبہ تھا کہ واپڈا آفس چلاس کے جنرل منیجر کا متاثرین کے ساتھ مسلسل جابرانہ رہے ہیں لہذا اُنہیں فور ا تبدیل کرکے کسی عوام دوست شخص کو تعین کریں تاکہ معاملہ بگڑنے کے بجائے حل ہوسکے۔ متاثرین نے وزیر اعظم پاکستان ، چیف جسٹس آف پاکستان اور چیف آف آرمی سٹاف سے متاثرین کے تحفظات و خدشات کو دور کرنے میں کردار ادا کرنے کا مطالبہ کیا ہے۔
متاثرین کے وفد نے عوامی ایکشن کمیٹی کے عہدے داران سے بھی ملاقات کی اور دیامر بھاشا ڈیم کی ڈیم رائلٹی اور متاثرین کی آباد کاری سمیت دیگر مسائل پر گفتگو ہوئی۔ اس موقع پر چیرمین عوامی ایکشن کمیٹی مولاناحافظ سلطان رئیس الحسینینے حکومت سے متاثرین کے تمام جائز مطالبات پر من عن منظور کرنے کا مطالبہ کیا ہے۔