اہم خبریں

بیرون ملک اثاثوں کے حوالے سے سابق صدر آصف زرداری نے سپریم کورٹ میں ناقابل یقین بیان حلفی جمع کرادیا۔

اسلام آباد(ویب ڈیسک) سابق صدر اور پاکستان پیپلزپارٹی کے شریک چیئرمین آصف علی زرداری نے قومی مصالحت آرڈیننس (این آر او) کیس میں بیان حلفی جمع کراتے ہوئے بیرون ملک بینک اکاؤنٹ یا جائیداد ہونے کا انکار کیا ہے۔سپریم کورٹ آف پاکستان میں منگل کے روز این آرو کیس کی سماعت ہوئی۔ سابق صدر نے اپنے وکیل فاروق ایچ نائیک کے توسط سے ایک صفحے پر مشتمل بیان حلفی عدالت میں جمع کرایا۔ذرائع کے مطابق بیان حلفی میں پیپلزپارٹی کے شریک چیئرمین نے اقرار کیا ہے کہ بیرون ملک ان کی کوئی جائیداد اور بینک اکاؤنٹ نہیں ہے۔سابق صدر نے عدالت میں جمع کرائے گئے بیان حلفی میں لکھا ہے کہ جو بات کی ہے اس پر قائم ہوں۔سپریم کورٹ نے این آر او کیس کی سماعت کی کل بدھ تک ملتوی کردی ہے۔
سپریم کورٹ آف پاکستان نے سابق صدورآصف علی زرداری اور جنرل (ر) پرویز مشرف سمیت این آر او کے مختلف فریقین کے اثاثوں کی تفصیلات طلب کر رکھی ہیں۔اس معاملے میں پرویز مشرف بھی جواب جمع کرا چکے ہیں۔ انہوں نے سپریم کورٹ میں جمع کرائے گئے جواب میں کہا تھا کہ این آراو کسی بدنیتی سے جاری نہیں کیا گیا بلکہ اس وقت کے سیاسی حالات کو مدنظر رکھتے ہوئے یہ قانون بنایا گیا اور این آراو کا اجرا کرکے کوئی غیرقانونی کام نہیں کیا گیا۔