اہم خبریں

اگلا وزیراعظم اور وزیراعلیٰ پنجاب کونسی پارٹی کا ہوگا؟،وزیراعظم نے پیشن گوئی کردی۔

اسلام آباد(ویب ڈیسک )وزیراعظم شاہد خاقان عباسی نے کہا ہے کہ جو 1500 دنوں میں کام نہیں کر سکے وہ اب 100 دنوں کا منصوبہ دے رہے ہیں۔ شیخوپورہ کے علاقے مانانوالہ میں تقریب سے خطاب کرتے ہوئے وزیراعظم نے کہا کہ جو آج 100 دنوں کا منصوبہ دے رہے ہیں یہ سب کام مسلم لیگ ن کی حکومت کر چکی ہے اب کسی اور کو یہ کام کرنے کی ضرورت نہیں، ہماری حکومت نے پانچ سال میں جو ترقیاتی کام کیے وہ پاکستانی تاریخ میں کبھی نہیں ہوئے ہماری حکومت کی کارکردگی جیسی ماضی میں کوئی مثال نہیں ملتی۔ انہوں نے کہا کہ الزامات لگانے اور گالیاں دینے والے پاکستان کی سیاست کی نمائندگی نہیں کرتے جو لوگ اخلاق سے گری ہوئی باتیں کرتے ہیں وہ عوام کی خدمت نہیں کر سکتے، عوام بہروپیوں اور وفادار یاں تبدیل کرنے والے سے بچے کیونکہ جو پارٹی کا وفادار نہیں ہوسکتا وہ ملک کا بھی وفادار نہیں، مسلم لیگ ن چھوڑ کر جانے والوں کو عوام مسترد کر دیں گے۔انہوں نے کہا کہ اگلا وزیراعظم اور وزیراعلیٰ پنجاب بھی مسلم لیگ ن کا ہوگا اس میں کوئی شک نہیں کہ اگلی حکومت بھی ن لیگ ہوگی اور عوام ہم پر ایک بار پھر اعتماد کریں گے، مسلم لیگ ن کے علاوہ کوئی جماعت ووٹ کی حقدار نہیں ہے۔