مجوزہ گلگت بلتستان پیکج 2018 کے خلاف متحدہ اپوزیشن کا گھڑی باغ میں گرما گرم جلسہ، آئینی صوبہ نہ بننے کی صورت میں آذاد کشمیر طرز کے سیٹ اپ کا مطالبہ کردیا۔

گلگت(ڈسٹرک رپورٹر) گلگت بلتستان پیکج 2018 کے خلاف ہفتہ کے روز گھڑی بازار گلگت میں متحدہ اپوزیشن کے زیر اہتمام زبردست عوامی اجتما ع کا اہتمام کیا گیا۔ اس موقع پر متحدہ اپوزیشن کے رہنماوں سمیت سماجی رہنماوں نے بھی خطاب کیا۔ اس موقع پر گلگت بلتستان قانون ساز اسمبلی میں اپوزیشن لیڈر کپٹن شفیع خان نے اپنے خطاب میں کہا کہ آرڈر 2018ء کے نام سے جو سفارشات تیار کی گئی ہیں ان میں قانون ساز اسمبلی اور وزیراعلیٰ کے اختیارات وزیراعظم کو منتقل کئے جارہے ہیں گلگت بلتستان کی تقدیر کا فیصلہ کرنے کا اختیار وزیراعظم کو دیاجارہا ہے گلگت بلتستان میں ٹیکس نافذ کرنے کا اختیار وزیر اعظم کو دیا جارہا ہے وزیراعظم جسے بنانے میں ہمارا کوئی کردار نہیں ہے کوگلگت بلتستان کا بادشاہ بنادیا گیا ہے اگر اس آرڈر کو گلگت بلتستان میں نافذ کیاگیا تو ہم ایف سی آر اور مہاراجہ کے دور سے بھی پیچھے جائینگے اس لئے ہم اس آرڈر کو نافذہونے سے روکنے کیلئے حکومت کا تختہ الٹنے ،تحریک عدم اعتماد اور قانون ساز اسمبلی سے اجتماعی طور پر مستعفی ہونے سمیت ہر آپشن استعمال کرینگے اُن کا کہنا تھا کہ گورننس آرڈر 2009 کے تحت دو شیڈول تھے شیڈول تھری کے تحت گلگت بلتستان کونسل کے پاس 54سبجیکٹ پر قانون سازی کے اختیارات تھے جبکہ شیڈول فور کے تحت قانون ساز اسمبلی کے پاس 61سبجیکٹ پر قانون سازی کے اختیارات تھے اس کے برعکس گلگت بلتستان آرڈر 2018 کی سفارشات میں شیڈول تھری اور فور کو مکس کرکے کل 62سبجیکٹ بنائے ہیں اور ان 62سبجیکٹ پر قانون سازی کے مکمل اختیارات وزیراعظم کو منتقل کئے گئے ہیں انہوں نے کہا کہ مجوزہ گلگت بلتستان آرڈر 2018 کی سفارشات کا مسودہ میرے پاس موجود ہے اس آرڈر کے آرٹیکل 61 کے تحت وزیراعلیٰ کے انتظامی اختیارات وزیراعظم کو منتقل کردئیے گئے ہیں۔ جبکہ آرٹیکل 64 کے تحت وفاقی حکومت جب چاہیے جہاں چاہیے گلگت بلتستان میں زمین حاصل کرسکتی ہے جبکہ وزیراعظم کو یہ اختیار بھی دیاگیا ہے کہ وہ گلگت بلتستان میں کسی بھی وقت ٹیکسوں کو نافذ کرسکتا ہے ۔انہوں نے کہا کہ مجوزہ سفارشات میں وزیراعظم کو گلگت بلتستان کا بادشاہ بنادیا گیا ہے ایک ایسے شخص کو گلگت بلتستان میں قانون سازی کے اختیارات دئیے گئے ہیں جسے آئین پاکستان میں بھی قانون سازی کے اختیارات حاصل نہیں ہیں ۔اُنکا مزید کہنا تھا کہ اس آرڈر کے تحت سٹیزن شپ ایکٹ 1951ء گلگت بلتستان میں بھی لاگو کردیا جائیگا جس کے بعد ملک کے کسی بھی صوبے کا شہری نہ صرف گلگت بلتستان کا شہری بنے گا بلکہ گلگت بلتستان میں الیکشن لڑنے کا بھی اہل ہوگا اور گلگت بلتستان کی خالی آسامیوں پر ٹیسٹ و انٹرویو دینے کیلئے بھی اہل ہوگا ۔انہوں نے کہا کہ اس آرڈر کے تحت آڈیٹر جنرل اور فیڈرل پبلک سروس کمیشن جیسے آئینی اداروں کا دائرہ اختیار گلگت بلتستان تک بڑھا دیا جائے گا اور ان اداروں کا دائرہ کار گلگت بلتستان تک بڑھانے میں کسی بھی قسم کی کوئی آئینی رکاوٹ نہیں ہے۔ مگر جب ہم یہ کہتے ہیں کہ سپریم کورٹ آف پاکستان کا دائرہ اختیار بھی گلگت بلتستان تک بڑھا دیاجائے تو کہاجاتا ہے کہ آئین پاکستان کا اطلاق گلگت بلتستان میں نہیں ہوسکتا ہے ۔انہوں نے کہا کہ مجوزہ گلگت بلتستان آرڈر کو نافذ ہونے سے روکنے کیلئے ہم اس صوبائی حکومت کا تختہ بھی الٹ دینگے دوسرا آپشن تحریک عدم اعتماد کا ہے اور تیسرا آپشن گلگت بلتستان کا درد رکھنے والے ممبران اسمبلی اجماعتی طور پر استعفیٰ پیش کرنے کا ہے۔ اور ہم اس آرڈر کو روکنے کیلئے ہر حد تک جائینگے ورنہ آنیوالی نسلیں ہمیں کبھی معاف نہیںکرینگی۔ اجتماع سے خطاب کرتے ہوئے بالا ورستان نیشنل فرنٹ کے چیئرمین نواز خان ناجی نے کہا کہ سیاسی جماعتوں کو جب تک ہم مضبوط نہیں کرینگے تب تک گلگت بلتستان کا مسئلہ کبھی حل نہیں ہوگا 1947ء میں جب قیام پاکستان عمل میں آیا تو ریاست جموں کشمیر میںدو علاقوں سے تحریک شروع ہوئی ایک پلندری سے تحریک شروع ہوئی ایک گلگت سے تحریک شروع ہوئی دونوں تحریکیں الحاق پاکستان کیلئے تھیں پلندری کی تحریک نے چار ہزار مربع میل علاقے کو آزاد کرایا جبکہ گلگت کی تحریک نے اٹھائیس ہزار مربع میل علاقے کو آزاد کرایا ،چارہزار مربع میل علاقہ آزاد ہونے کے بعد سیاسی قیادت کی وجہ سے ریاست جموں کشمیر کے نام سے آزاد ریاست قائم ہوئی صدر بھی بنا وزیراعظم بھی بنا جھنڈا بھی ملا اور شناخت بھی ملی جب گلگت بلتستان میں سیاسی قیادت نہ ہونے کی وجہ سے صرف ڈنڈا ملا ،آزادکشمیر میںحولدار صدر بنا جبکہ یہاں کا صدر سی ایس او بنا انہوں نے کہا کہ جب تک ہم متحدہ نہ ہوں ہمیں کچھ بھی ملنے والا نہیں ہے انہوں نے کہاکہ میں شروع دن سے کہتا رہا ہوں کہ ہمیں صوبہ نہیں مل سکتا ہے ہمیں آزادکشمیرطرز کا سیٹ اپ بھی ملنے والا نہیں ہے ہمیں اقوام متحدہ کی قرار دادوں کے تحت سلف رول کیلئے جدوجہد کرنی ہوگی دفاع ،کرنسی اور خارجہ امور وفاق کے پاس ہونگے جبکہ ہمیں مکمل داخلی خود مختاری کے حصول کیلئے کوشش کرنی ہوگی ۔ اس موقع پر رکن اسمبلی جاوید حسین نے کہا کہ گلگت بلتستان آرڈر 2018 کو اگر گلگت بلتستان قانون ساز اسمبلی میں پیش کئے بغیر ہمارے اوپر مسلط کیا گیا تو ہم گلگت بلتستان کی تمام سڑکوں کو جام کردیں گے انہوںنے کہا کہ ملک کے دیگر صوبوں میں علیحدگی کی تحریکیں چل رہی ہیں جبکہ گلگت بلتستان کے عوام گزشتہ ستر سالوں سے پاکستان میں شامل ہونے اور پانچواں صوبہ بنانے کا مطالبہ کرتے رہے ہیں جس کے جواب میں کہا جاتا ہے کہ یہ متنازعہ علاقہ ہے صوبہ نہیں بن سکتا ہے اگر یہ علاقے متنازعہ ہیںتو ہمیں کشمیر طرز کا سیٹ اپ دیاجائے۔ انہوں نے کہا کہ گلگت بلتستان قانون ساز اسمبلی نے ان علاقوں کو پانچواں آئینی صوبہ بنانے کی قرار داد منظور کی تھی اس قرارداد کی روشنی میں سرتاج عزیز کمیٹی نے گلگت بلتستان کو عبوری آئینی صوبہ بنانے کی سفارش کی تھی لیکن وزیراعلیٰ گلگت بلتستان نے وزیراعطم آزادکشمیر سے ملکر گلگت بلتستان کے حقوق کا سودا کیا ہے۔ مگر ہم گلگت بلتستان کے حقوق کا ہر صورت میں تحفظ کرینگے انہوںنے کہا کہ وزیراعلیٰ حفظ الرحمن سے ہمارا کوئی ذاتی تنازعہ ہے نہ کوئی علاقائی تنازعہ ہے تنازعہ صرف یہ ہے کہ وزیراعلیٰ گلگت بلتستان کا سودا کرنا چاہتے ہیں ہم مخالفت میں کھڑے ہیں۔ انہوں نے کہاکہ وزیراعلیٰ نے ٹھیکے فروخت کئے ہم نے برداشت کیا من پسند لوگوں کو نوکریوں سے نواز ہم نے برداشت کیا مگر گلگت بلتستان کا سودا کبھی بھی برداشت نہیں کرینگے انہوں نے کہا کہ گلگت بلتستان میں جب کبھی بھی اصلاحات ہوئی ہیں پی پی کے دور میں ہوئی ہیں مسلم لیگ ن تین دفعہ وفاق میں برسراقتدار آئی ہے مگر تینوں مرتبہ گلگت بلتستان میں کچھ بھی اصلاحات نہیں کی ہیں انہوں نے کہا کہ وزیراعلیٰ گورننس کی بڑی بڑی باتیں کرتے ہیں لیکن عملاً ترقیاتی فنڈز نصف درجن معاونین خصوصی اور مشیروں کی تنخواہوں کی مد میں خرچ ہورہا ہے ایک معاون خصوصی کی تنخواہ ماہانہ ساڑھے چار لاکھ روپے ہے انہوں نے کہا کہ وزیراعلیٰ نے اپنے بھائی کو تو مستقل کردیا مگر غریب کنٹریکٹ ملازمین دھرنے میں بیٹھے ہوئے ہیں مگر کوئی پوچھنے والا نہیں ہے عوامی ایکشن کمیٹی کے چیئرمین مولانا سلطان رئیس نے اجتماع سے خطاب کرتے ہوئے کہا کہ یکم نومبر 1948 کو ہمارے آبا و اجداد نے بغیر کسی شرط کے گلگت بلتستان کا پاکستان سے الحاق کرکے بتادیا تھا کہ ہم کیا چاہتے ہیں ہمارے بزرگوں اور شہدا کی قبروں پر لہرانے والا پاکستان کا جھنڈا بتارہا ہے کہ ہم کیا چاہتے ہیں اس کے باوجود ہم سے پوچھا جارہا ہے کہ تم کیا چاہتے ہو ہم یہ سوال حکمرانوں سے کرتے ہیں کہ تم کیا چاہتے ہو ہم نے اسلامی جذبے کے تحت کلمہ کی بنیاد پرپاکستان سے الحاق کیا تھا ہم جب پانچواں آئینی صوبہ بنانے کا مطالبہ کرتے ہیں توکہاجاتا ہے کہ پانچواں صوبہ بنانے میں ریاست کو مشکلات ہیںہم کہتے ہیں کہ ٹھیک ہے صوبہ بنانے میں ریاست کو مشکلات ہیں تو ہمیں کشمیر طرز کا سیٹ اپ دیدو تو کہا جاتا ہے کہ کشمیر طرز کا سیٹ اپ دینے میں ریاستی اداروں کو مشکلات ہیں انہوں نے کہا کہ اگر صوبہ بنانے اور کشمیر طرز کاسیٹ اپ دینے میں مشکلات ہیں تو حکمران ہمیں بتائیں کہ آخر ہم کیا مانگیں انہوں نے کہا کہ ہم نے پاکستان میں شامل ہونے اور پاکستان کا شہری بننے کیلئے ستر سال برداشت کیا انہوں نے کہا کہ ہم نے گورننس آرڈر2009 کو بھی مسترد کیا تھا اور اب گلگت بلتستان آرڈر2018 کو بھی مسترد کرتے ہیں ہمیں کوئی سیٹ اپ اورپیکیج کی کوئی ضرورت نہیں ہے اب ہم داخلی خودمختاری کا مطالبہ کرتے ہیں دفاع اور خارجہ پالیسی کے سوا تمام اختیارات ہمیں دئیے جائیں