افسر شاہی کہوں یا فرعونیت ۔۔۔

آج دوپہر میں نور خان ائیر بیس ائیرپورٹ سے گزرتے ہوئے جب سڑک کے بائیں جانب لگے سائن بورڈ جس پر کاشانہ گلگت بلتستان لکھا ہوا تھا اس پر نظر پڑی تو سوچا کہ اندر جایا جائے تاکہ سلام دعا بھی ہو جائے گی اور ساتھ ہی ساتھ وزیر اعلی یا چیف سکریٹری کے اسلام آباد وزٹ شیڈول کے بارے میں بھی کچھ معلومات حاصل ہوگی۔
جیسے ہی مین روڈ سے اندر کی طرف مڑا تو بائیں جانب بڑا سا گیٹ جو کہ مکمل طور پر کھلا ہو ا تھا اور سائیڈ پر مطلوبہ سائن بورڈبھی لگا ہوا تھا۔ چونکہ کوئی سیکورٹی عملہ موجود نہیں تھا لہذا میں آفس کی طرف چل پڑا جہاں پر کو آرڈنیشن سیکریٹری کا بورڈ لگا ہوا تھا اور ساتھ ہی ایک چھوٹے سے آفس میں کچھ لوگ بیٹھے ایک دوسرے سے با ت چیت میں مصروف تھے۔جب ان سے پوچھنے کے بعد کوئی معلومات حاصل نہیں ہو سکی تو میں نے مناسب سمجھا کہ کوآرڈنیشن سیکریٹری کے آفس سے پتا کرلوں۔ دستک کے بعد بھی جب کوئی جواب نہیں ملا جبکہ اس آفس سے ملحقہ ایک اور آفس سے کچھ لوگوں کی باتیں کرنے کی آوازیں آرہی تھیں۔ لہذا میں اس آفس کی طرف بڑھا۔ آگے بڑھنے سے پہلے آپ کو بتاتا چلوں کہ سوائے ایک کمرہ جس پرکوآرڈنیشن سیکریٹری کا بورڈ آویزاں تھا اورکسی بھی آفس کے دروازے پر کوئی بھی سائن بورڈ نہیں لگا ہوا تھا۔ جب میں آگے بڑھا اور اس آفس نما کمرے تک پہنچا جسکا دروازہ کھلا ہوا تھا جہاں پر تین افراد صوفے پر براجمان آپس میں خوش گپیوں میں مصروف تھے۔ میں ابتدائی دعائیہ کلمات کے بعد کسی ذمہ دار فرد کے بارے میں ابھی پوچھنے ہی لگا تھا کہ ان میں سے ایک شخص اٹھا اور مجھے اپنے ساتھ با ہر کی طرف آنے کا اشارہ کیا۔ میں نے سوچا شائد وہ مجھے کسی ذمہ دار آفیسر سے ملا نے جا رہا ہے لہذا میں انکو فالو کرتے ہوئے باہر کی طرف نکل آیا۔ آفس سے باہر برآمدے میں پہنچنے کے بعد وہ یک لخت رک گیا اور انگریزی میں مجھ سے پوچھنے لگا کہ آپ کو کس نے اجازت دی اندر آنے کی، کیا آپ کو آفس ڈیکورم کا معلوم نہیں۔پہلے میں نے انتہائی معذرت خواہانہ انداز میں عرض کیا کہ جناب آپ جو بھی فرما رہے ہیں وہ بجا ہے لیکن کیا آپ کو معلوم ہے جو کچھ آپ فرما رہے ہیں وہ اور جو آپ کے آفس کے زمینی حقائق ہیں وہ بلکل محتلف ہیں۔ چلو آپ کی بات مان لیتے ہیں اور آفس ڈیکورم کی بات کرتے ہیں۔ آپ سے میں گزارش کروںکہ کس ڈیکورم کی آ پ بات کررہے ہو ۔ میں آپ کو عرض کرتا ہوں کہ آفس ڈیکورم کیا ہوتا ہے۔ ہر آفس ہولڈ ر کی یہ ایک اخلاقی ذمہ داری ہوتی ہے کہ آنے والے وزیٹرز کو پروفیشنل طریقے سے ویلکم کرے،عزت دے، آنے کا مقصد پوچھے، مطلوبہ ذمہ دار آفیسر سے ملائے اور انکے مسائل کا حل نکالے تاکہ وہ لوگ جن کے ٹیکس کے پیسوں سے آپکی یہ شاہانہ طرز زندگی، پر آسائش آفس ، چمچماتی گاڑیاں اور ان گاڑیوں میںپیٹرول کی شکل میںجلنے والے انکے خون سے جو تکلیف ان کو پہنچتی ہے اس تکلیف میں تھوڑی سی کمی ہو۔اگر آپ انکے مسائل حل کرنے کے قابل نہیں تو پھر آپکو اس آفس سمیت دوسرے سارے سرکاری سہولیات کے استعمال کرنے کا کوئی حق نہیں۔
یہ کاشانہ گلگت بلتستان ہے جہاں پر کو آرڈنیشن سیکریٹری گلگت بلتستان ہوتے ہیں اور وزیر اعلی گلگت بلتستان کے سٹاف جب اسلام آباد آتے ہیں تو یہاں پر رہائش پزیر ہوتے ہیں۔ یہ راولپنڈی کے مصروف ترین ائیرپورٹ روڈ پر موجود ہے۔ سکیورٹی کا یہ حال ہے کہ باہر کا مین دروازہ ایسے کھلا ہے جیسے دعوت عام ہو۔ کو ئی سکیورٹی کا انتظام نہیں۔ جس کا دل چا ہے اندر داخل ہو سکتا ہے۔اندر کا حال یہ ہے کہ نہ موصوف کے آفس کے باہر اور نہ ہی دوسرے کسی آفس کے اندر کوئی ذمہ دار شخص موجودہے جس سے کچھ معلو مات لے سکیں۔اور اگر کسی طرح ڈھونڈتے ہوئے کوئی سائل ان تک پہنچ جائے تو انکا رویہ ایسا جارحانہ کہ جیسے وہ ان کے زر خرید غلام ہوں۔ میں یہ سب اپنے ذاتی وزٹ کے دوران جو میں نے وہاں observe کیا اسکی بنیاد پر بتا رہا ہوں۔ اگر یہ بھی مان لیا جائے کہ میرا وزٹ آفس آورز کے بعد تھا تو پھر بھی کم از کم کسی ایک سٹاف کا وہاں ہونا ضروری تھا تاکہ رہنمائی کر سکے۔ اسطرح سے ایک آفس کو بناء سکیورٹی کے چھوڑنا کسی بھی آنے والے ناخوشگوار واقعے کا سبب بن سکتا ہے۔
کو آرڈنیشن سیکریٹری صاحب کا یہ بھی کہنا تھا کہ وہ عوام کے نہیں حکومت کے ملازم ہیں۔ انکی سادگی کا کیا کہنا کہ وہ بھول چکے ہیں کہ عوام کے ٹیکس کے پیسوں پر انکے گھر کا چولہا جلتاہے۔ اور عوام کے مسائل کو حل کرنا انکی ڈیوٹی کے اولین فرائض میں شامل ہے۔ یہ مزین آفس ، چمچماتی گاڑی اور اس گاڑی میں ڈلنے والا فیول جو کہ فیول نہیں عوام کا خون ہے جسکو وہ روزانہ جلاتے ہیں انکو اسی لئے دیا جاتا ہے کہ وہ عوام کے سوالوں کا جواب دیں اور انکے مسائل کو حل کرے۔ لیکن افسوس ان کو کون سمجھائے؟؟؟ پروفیشن کے تعارف کے باوجود اگر میرے ساتھ یہ سلوک ہو سکتا ہے تو ایک عام شہری کے ساتھ یہاں کیا رویہ روا رکھا جاتا ہوگا۔ چیف سیکریٹری کی بہت تعریفیں سنی ہیں کہ وہ بہت عوام دوست اورغریب پرورانسان ہیں ان سے میری گزارش ہے کہ براہ کرم کوآرڈنیشن سکیریٹریٹ اسلام آباد کے سٹاف کے غیر پیشہ ورانہ رویوں پر پر تھوڑا توجہ دیں تاکہ جو عوام یہاں آئے وہ اچھا میسیج لیکر جائیں۔

تحریر: احسان علی