ضلع کھرمنگ میں ڈسٹرک انتظامیہ کی جانب سے سالانہ ترقیاتی پروگرام کی نشاندہی کیلئے سروے کے نام پر ڈھونگ۔

کھرمنگ(نامہ نگار) ضلعی انتظامیہ کھرمنگ کی جانب سے ایک اشتہار جاری کیا ہے جس کے مطابق مقامی انتظامیہ سالانہ ترقیاتی پروگرامز برائے 2017/18کیلئے ترقیاتی اسکیموں کی نشاندہی کرنے کیلئے تمام یونین کونسلوں کا دورہ کر رہے ہیں۔ اس اشتہارکی اشاعت سرکاری رجسٹر میں انداراج کی حد تک تو ٹھیک ہے لیکن اس دورے سے علاقے میں ترقیاتی فنڈ میرٹ کی بنیاد پر تقسیم ہونے کی کوئی گارنٹی نہیں۔کیونکہ کھرمنگ میں آج تک کوئی بھی کام میرٹ پر نہیں ہوا بلکہ سیاسی اثر رسوخ اورکمیشن اور رشوت کی بنیاد پر منصوبے لیتے اور کھاتے رہے ہیں۔ کھرمنگ کے نالہ جات میں واٹر شیڈ اور کوہل کے پراجیکٹس ایک طرح سے علاقے کے سرکردگان کیلئے فکس ڈیپازٹ کی حیثیت رکھتے ہیں جہاں سرکاری آفیسرز کی بلی بھگت سے جعلی پراجیکٹ بناکر سرکاری خزانے کو چونا لگایا جاتا ہے۔لہذا انتظامیہ اگر واقعی میں کھرمنگ کیلئے مختص سرکاری فنڈز کو چند افراد کے جیب کے بجائے عوام فلاح کیلئے خرچہ کرنے کیلئے پرخلوص ہیں تو سب سے سیاسی اثر رسوخ کو ختم کریں۔ کیونکہ اس وقت وزیر اطلاعات اور اسپیکر فدامحمد ناشاد کی آشیرباد سے اُن کے سیاسی سپورٹرزسرکاری فنڈز میں کرپشن اور منصوبوں کی بندبانٹ کا ایک بازار گرم کیا ہوا ہے۔لہذا ڈسی کھرمنگ کو چاہئے کہ اس قسم کی سروے کرکے غریب عوام کو بیوقوف بنانے کے بجائے میرٹ کی بالادستی کیلئے عملی کوشش کریں تاکہ علاقے کے مسائل بہتر انداز میں حل ہوسکے۔