گلگت بلتستان آرڈر 2020 نافذ کرنے کی تیاریاں مکمل،وزیر اعظم نے گرین سگنل دے دی۔

اسلام آباد( غلام عباس سے)جی بی ریفارمز آرڈر 2019ء کو ایک سال تک التوا میں رکھنے کے بعد تحریک انصاف کی وفاقی حکومت نے ایک نئے آرڈر کو حتمی شکل دیدی ہے۔اہم ذرائع نے کے پی این کو بتایا کہ بدھ کے روز وزیر اعظم عمران خان کی زیر صدارت اعلیٰ سطح کا اجلاس ہوا جس میں گورنر گلگت بلتستان راجہ جلال حسین مقپون، وزیر اعلیٰ حفیظ الرحمن، وزیر امور کشمیر علی امین گنڈاپور، سیکرٹری کشمیر افیئرز، چیف سیکرٹری جی بی سمیت اعلیٰ سول و عسکری حکام نے شرکت کی۔ وزارت امور کشمیر کے اہم ذرائع تصدیق کی ہے کہ مجوزہ آرڈر 2020ء فائنل سٹیج پر پہنچ چکا ہے جلد ہی وفاقی کابینہ میں پیش کیا جائے گا، نیا آرڈر جی بی ریفارمز آرڈر2019ء میں ترمیم کی نئی شکل ہو گی جس میں تمام انتظامی اختیارات گلگت بلتستان کو منتقل کیے جائیں گے جس سے کشمیر کاز پر بھی کوئی فرق نہیں پڑے گا۔ اجلاس میں شریک گلگت بلتستان کے ایک ذمہ دار سے رابطہ کیا گیا تو انہوں نے کسی بھی قسم کی تفصیل بتانے سے انکار کیا تاہم ایک اور اہم ذرائع نے بتایا کہ بدھ کے روز ہونے والے اجلاس میں آرڈر 2020ء کو حتمی شکل دیدی گئی ہے ۔سرکاری ذرائع کے مطابق آرڈر 2019ء سے متعلق بعض سٹیک ہولڈرز کو کچھ تحفظات تھے، دوسری جانب وفاقی حکومت کی جانب سے سپریم کورٹ میں درخواست دائر کرنے کے بعد آرڈر پر عملدرآمد التوا میں پڑ گیا تھا، اب وفاقی حکومت سپریم کورٹ میں دائر درخواست واپس لے گی اور ساتھ یہ اپیل بھی کی جائے گی کہ نئے آرڈر کی منظوری دی جائے کیونکہ نئے آرڈر کو تمام سٹیک ہولڈرز کی حمایت حاصل ہے۔ یاد رہے کہ مسلم لیگ ن کے دور میں آرڈر 2018ء نافذ کیا گیا تھا جس کیخلاف عوام کی طرف سے شدید رد عمل آیا تھا تاہم بعد میں جب یہ معاملہ سپریم کورٹ کی ٹیبل پر پہنچا تو عدالت کے سات رکنی لارجر بنچ نے 17جنوری 2019ء کو آئینی حقوق کے کیس کا فیصلہ سنایا اور ساتھ ہی وفاقی حکومت کی جانب سے مجوزہ آرڈر 2019ء کو بھی اپنے فیصلے کا حصہ بنادیا۔ عدالت نے وفاقی حکومت کو ایک ہفتے کے اندر نئے آرڈر پر عملدرآمد کا حکم دیا تھا تاہم ایک سال گزرنے کے بائوجود بھی سپریم کورٹ کے اس فیصلے پر عمل نہ ہو سکا۔