تازہ ترین

ریحام خان کی کتاب میں آئی ایس آئی کے افسر پرسنگین الزام کا انکشاف۔

اسلام آباد (مانیٹرنگ ڈیسک،این این آئی)ریحام خان کی کتاب سے متعلق مزید انکشافات سامنے آنے کا سلسلہ جاری ہے۔ نجی ٹی وی پروگرام میں بات کرتے ہوئے حمزہ علی عباسی نے کہا کہ ریحام خان نے اپنی کتاب میں کئی بڑے ٹی وی اینکرز پر ایجنسیوں کے ایجنڈے پر کام کرنے اور ان سے پیسے لینے کا الزام عائد کیا ہے۔حمزہ علی عباسی نے کہا کہ اپنی کتاب میں ریحام خان نے یہ بھی کہا کہ آئی ایس آئی کے ایک کرنل رینک کے افسر نے ان کو بلایا ،لفافے کی پیشکش کی اور کہا کہ ہم چاہتے ہیں آپ ہمارے لیے یہ کام کریں۔ آہستہ آہستہ ان سے بات کی کہ ذرا آپ بھی ہمارے ساتھ شریک ہوں۔ لیکن چونکہ ریحام خان بہت دیانتدار ہیں لہٰذا انہوں نے لکھا کہ میں نے کرنل کو منع کر دیا اور کہا کہ مجھے کوئی خرید نہیں سکتا۔دریں اثنا ریحام خان نے کہا ہے کہ میری کتاب میں ایک بلیک بیری کا ذکر ہے اور تحریک انصاف اسی سے خوفزدہ ہے۔ ایک انٹرویومیں انہوں نے کہا کہ کوشش ہے کہ کتاب انتخابات سے پہلے شائع ہو، کتاب پر رائیونڈ کنکشن کا الزام لگایا ہے تو ثبوت بھی لائیں۔ ریحام خان نے کہا کہ پارٹی ترجمان فواد چوہدری کی پریس کانفرنس پر توجہ نہیں دینی چاہیے، کسی کو حق نہیں کہ مجھے وارننگ دے، میں کسی کی عزت نہیں اچھال رہی، یہ خود باتیں کر رہے ہیں۔انہوں نے کہا کہ میں کسی کے کندھے پر بندوق رکھ کر کتاب نہیں لکھ رہی، میرے پاس ای میلز بھی ہیں اور شواہد بھی موجود ہیں۔چیئرمین تحریک انصاف کی سابق اہلیہ نے کہا کہ تردید میں تب کروں جب میں نے کوئی بیان دیا ہو، تردید تو پی ٹی آئی کو کرنی چاہیے، یہ کتاب حمزہ عباسی کی سوشل میڈیا پر ہے وہ تردید کریں۔ریحام خان نے واضح کیا کہ میرے پیچھے کوئی مغربی قوت اور سیاسی جماعت نہیں ہے، میں کسی کی عزت نہیں اچھال رہی یہ خود باتیں کر رہے ہیں،میں جوابدہ نہیں ہوں۔انہوں نے کہا کہ پی ٹی آئی سمجھتی ہے کہ وہ بڑی جماعت ہے لیکن میں نہیں سمجھتی۔عمران خان کی سابق اہلیہ نے کہا کہ میری کتاب جب شائع ہو جائے پھر جس کو جو کہنا ہے کہے۔انہوں نے بتایا کہ پی ٹی آئی کے کافی لوگ میرے ساتھ رابطے میں ہیں ٗبہت لڑکیاں جو پارٹی میں خود کو محفوظ نہیں سمجھتیں رابطہ کرتی ہیں۔ریحام خان نے کہا کہ لیگل نوٹس میں احسن اقبال کا کوئی تذکرہ نہیں، ان سے ملاقات کا اتفاق نہیں ہواتو مریم نواز سے کیسے ہو سکتی ہے۔ان کا کہنا تھا کہ یہ کس بات سے ڈر رہے ہیں،مجھے چپ کیوں کرا رہے ہیں؟ جہاں تک ہو سکا میں ان مافیا کیخلاف لڑوں گی۔ترجمان پی ٹی آئی فواد چوہدری کا کہنا ہے کہ ریحام خان کا کتاب کے مواد کی تصدیق نہ کرنے کا مطلب ہے کہ جو کچھ کہا جا رہا ہے وہ کتاب میں موجود ہے۔ فواد چوہدری نے کہا کہ پاناما فیصلے کے 3 دن بعد حنیف عباسی اور عابد شیر علی نے کہا تھا کہ ایک کتاب آئے گی، (ن) لیگ پہلے بھی بینظیر بھٹو اور نصرت بھٹو کے خلاف ایسا کر چکی ہے۔

  •  
  •  
  •  
  •  
  •  
  •  

About TNN-ISB

اپنی رائے کا اظہار کریں

آپ کا ای میل ایڈریس شائع نہیں کیا جائے گا.

*